Dərnək

Dərnəklər - məktəb tərəfindən təşkil edilir, balabilgələrin həvəsli və maraqlı olduğu istiqamətdə müəyyən olunmuş müəllimlər tərəfindən ödənişsiz və və ya ödənişli şəkildə təşkil edilir.

Dərnəklərin təşkilində əsas məqsəd balabilgələrin mövcud potensiallarının inkişafı, məlumatlılıq səviyyəsinin artırılması üçün lazımi şəraitin yaradılması, tədris proqramları əsasında qazandıqları bilik və bacarıqlarının genişləndirilməsi, onlarda yaradıcılıq və tətbiqetmə bacarıqlarının formalaşdırılmasından ibarətdir. Balabilgələrin könüllülüyü əsasında təşkil olunan bu və digər dərnək məqsəd və məzmunundan asılı olaraq bir, yaxud bir neçə dərs ili ərzində fəaliyyət göstərə bilər. Dərnəklər ibtidai, ümumi orta və tam orta təhsil səviyyəsində təhsil alan balabilgələrdən təşkil edilir. Həmin dərnəklər komplektləşdirilərkən sinif səviyyəsindən asılı olmayaraq balabilgələrin marağı, istedad və intellekti nəzərə alınır. Dərnəklər, bir qayda olaraq, 8 nəfərdən az olmamaqla komplektləşdirilir. Hər hansı bir dərnəkdə balabilgələrin maksimum sayı 15 nəfər müəyyən edilir.

Dərnək rəhbəri məktəb direktorunun əmri ilə təyin və azad edilir. İdman istiqamətli dərnəklərə cəlb edilmiş balabilgələr üçün onların sağlamlığı barədə tibbi arayış təqdim olunmalıdır. Məktəbin rəhbərliyi təşkil olunan dərnəklərin səmərəli fəaliyyəti üçün məsuliyyət daşıyır. Dərnəklərin işinə ümumi rəhbərlik və nəzarət direktor müavinlərindən birinin vəzifə bölgüsünə daxil olunur. Dərnəklərin dərs ili (illəri) ərzin- dəki fəaliyyəti balabilgələrin cəlb olunduqları dərnəklərin təyinatına uyğun tədbirlərdə (sərgi, müsabiqə, yarış, konsert, olimpiada və s.) iştirak səviyyəsinə görə qiymətləndirilir.

Məktəbdə büdcə vəsaiti hesabına maliyyələşdirilən dərnəklərlə yanaşı bu qaydadan irəli gələn tələblər nəzərə alınmaqla ödənişli və ictimai əsaslarla da dərnəklər təşkil oluna bilər. İnsanlar sosial varlıqlardır, fərdlərin və cəmiyyətin inkişafı hər ikisinin konstruktiv qarşılıqlı münasibətindən asılıdır. Psixoloq və pedaqoqlar uşaq və yeniyetmələrin inkişafında zəngin sosial mühitin rolunu vacib qiymətləndirirlər. Bunları nəzərə alan Hədəf Liseyi balabilgələri üçün maraqlı fəaliyyətləri ehtiva edən zəngin sosial mühit yaratmağı özünə borc bilir.

Liseyimizdəki sosial fəaliyyətlərin məqsədi balabilgələrimizin maraq dairələrini, bacarıqlarını, mədəniyyət və idman sahəsinə həvəslərini genişləndirmək və gücləndirməklə yanaşı onlara gələcək karyeralarında komanda üzvü və komanda lideri kimi işləmək vərdişlərini aşılamaqdır. Hədəf Liseyi İdarə Heyəti olaraq balabilgələrlə 10 illik iş təcrübəmizə, beynəlxalq dərəcəli təhsil mütəxəssislərinin tövsiyələrinə və qabaqcıl orta təhsil praktikalarına əsaslanaraq sosial fəaliyyətlərimizi dörd qrupa ayırmışıq:

• İdman – futbol, voleybol, basketbol, stolüstü tennis, atçılıq, oxçuluq, alpaqut.
• İntellekt – şahmat, kodlaşdırma, robotiks, rus dili, ingilis dili, Math English.
• Yaradıcılıq – qrafik dizayn, heykəltəraşlıq, kulinariya, dekorativ tətbiqi sənət, rəsm.
• İncəsənət – rəqs, piano, gitara, vokal və xor, saz.

Hədəf Konseptinə uyğun olaraq tədris ili ərzində nəzərdə tutulan dərnək və klubların ümumi bölgüsü aşağıdakı kimi nəzərdə tutulub. Şahmat, məntiq, drama və gimnastika dərnəkləri dərs cədvəlində ibtidai siniflərin bütün bölmələrində yer alıb ki, tədris planında da buna 1 saat ayrılıb.

Dərnəklər:

• Robototexnika
• Kodlaşdırma
• Şahmat*
• Futbol
• Voleybol
• Basketbol
• Gimnastika/Ritmika*
• Rəsm
• Yaradıcılıq
• Oxçuluq
• Qrafik dizayn
• Kulinariya
• Məntiq*
• Foto
• Vokal və xor
• Stolüstü tennis
• Heykəltaraşlıq
• Gitara
• Dram*

Dərnək və klubların müxtəlifliyi və tələbata cavab verməsi valideyn-məktəb əməkdaşlığı üzərində qurulur və fəaliyyəti tənzimlənir.

Dərnəklərin ilboyu uğurlu fəaliyyətinin təmin edilməsi üçün yerinə yetirilməli olan müddəalar:

1. Dərnəklərin fəaliyyətə başlama vaxtı 1 oktyabr 2020-ci il nəzərdə tutulur.
2. Dərnəklər liseyin I-VIII siniflərini əhatə edir.
3. Dərnəklərin ümumi siyahısı və nəzərdə tutulan siniflərin bölgüsü 20 sentyabra kimi dərnək rəhbəri (koordinator) tərəfindən tərbiyə işləri üzrə direktor müavininə təhvil verilir.
4. Həftənin dörd günü son dərsləri əhatə etməklə dərnək məşğələləri müvafiq siniflər üzrə bölüşdürülür.
5. Dərs cədvəlində ibtidai siniflər üçün dərnək saatları həftənin bazar ertəsi və çərşənbə axşamı günləri, yuxarı siniflər üçün isə çərşənbə və cümə günləri qeyd olunur.
6. Balabilgələr seçimlərini həftədə bir dəfə 2 dərnək, həftədə iki dəfə olmaqla isə 1 dərnək üzərindən apara bilərlər.
7. Dərnək müəllimləri icraçı direktor tərəfindən təyin olunur.
8. Dərnək müəllimləri balabilgələrin siyahısını, dərs mövzularını onlara ayrılan dərnək jurnallarında qeyd edir.
9. Dərnək rəhbəri mütəmadi olaraq hər bir dərnəyin keçirilməsi üçün nəzərdə tutulan otaq və kabinetləri əvvəldən təyin edir.
10. Dərnəklər başlayan zaman balabilgələrin məşğələlərə yönləndirilməsinə dərnək rəhbəri və hər sinfin sinif rəhbəri nəzarət edir.
11. Ödənişli dərnəklər mühasibatlıqda qeydiyyatdan keçir, ödənişin vaxtı dərnək rəhbəri tərəfindən sinif rəhbərlərinə xatırladılır.
12. Dərnəklərin komplektləşdirilməsi zamanı məktəbdaxili sosiallaşma məqsədilə sinif və bölmə birləşməsi mümkün hesab edilir.